गोविंद चव्हाण

'सुप्रिया प्रॉडक्शन' तर्फे आयोजित 'बोलीभाषा एकांकिका स्पर्धा' ही एकमेव अशी एकांकिका स्पर्धा आहे जी पूर्णपणे राजभाषा मराठी च्या प्रादेशिक बोलीभाषांवर आधारित आहे.

मालवणी, कोंकणी, घाटी, वऱ्हाडी, आगरी, कोळी , सातारी, खानदेशी, झाडी आणि यासारख्या मराठी च्या जवळजवळ ५६ बोली महाराष्ट्राच्या  विविध प्रांतांमध्ये बोलल्या जातात.

या बोलीभाषांचे जतन आणि संवर्धन करण्याची संकल्पना मालवणी नाटककार गंगाराम गवाणकर यांनी, जेव्हा ते २०१६ साली मराठी नाट्य संमेलनाध्यक्ष होते, त्यांच्या अध्यक्षीय भाषणात मांडली होती. त्यांची संकल्पना कलेच्या माध्यमातून सत्यात उतरवण्याचे शिवधनुष्य 'सुप्रिया प्रॉडक्शन'चे कर्ताधर्ता प्रसिद्ध नाट्य-निर्माता गोविंद चव्हाण यांनी मराठी भाषेच्या प्रेमापोटी उचलले.

एक राज्यस्तरीय आगळीवेगळी बोलीभाषा एकांकिका स्पर्धा भरवून आपल्या बोली आणि आपली संस्कृती जपण्याची धुरा त्यांनी २०१६ पासून चार वर्षे समर्थपणे सांभाळली. 'हृदयाची भाषा बोलीभाषा' ही या एकांकिका स्पर्धेची टॅग-लाईन ! या स्पर्धेला नाट्य-रसिक, कलाकारांचा प्रतिसाद ही उत्तम मिळाला. २०२० मध्ये होणारी स्पर्धा कोरोना काळामुळे 'ऑनलाईन' घेण्याची त्यांची तयारीही सुरु होती. परंतु नावारूपाला  आलेली ही स्पर्धा कोरोना महामारी मध्ये झालेल्या त्यांच्या आकस्मिक निधनामुळे बंद होते की काय अशी भीती वाटत असताना चव्हाण यांची कन्या सुप्रिया हिने वडिलांचा वसा पुढे चालवण्याचा महत्त्वाचा धाडसी निर्णय घेतला. 

 

सुप्रिया प्रॉडक्शन च्या राज्यस्तरीय  'बोलीभाषा एकांकिका स्पर्धे'चे हे नववे वर्ष सुप्रिया चव्हाणच्या यशस्वी मार्गदर्शनाखाली साजरे होत आहे, हे प्रशंसनीय आहे. 'सुप्रिया प्रॉडक्शन' च्या वतीने ह्या वर्षीच्या 'बोलीभाषा एकांकिका स्पर्धे'ची प्राथमिक फेरी डिसेंबर २०२५ च्या शेवटच्या आठवड्यात घेतली जाईल आणि अंतिम फेरी जानेवारी २०२६ मध्ये आयोजित होईल.

या वर्षी होणाऱ्या नवव्या राज्यस्तरीय बोलीभाषा एकांकिका स्पर्धेसाठी प्रथम तीन सांघिक विजेत्यांना  रुपये २१ हजार , १५ हजार, १० हजार अशी पारितोषिके आहेत. याशिवाय लेखन, दिग्दर्शन, नेपथ्य, प्रकाश,पार्श्वसंगीत, रंगभूषा, वेशभूषा, विनोदी लेखन, विनोदी अभिनय, उत्तम व्यवस्थापन अशी विविध पारितोषिके नाट्यक्षेत्रातील दिग्गजांच्या स्मरणार्थ देण्यात येणार आहेत. रु. २१००० चे स्पर्धेचे प्रथम पारितोषिक गोपीनाथ सावकार यांचे भाचे प्रसिद्ध अभिनेते अशोक सराफ व सुभाष सराफ यांनी पुरस्कृत केले आहे.

​

व्यावसायिक नाटकांची निर्मिती करणारे गोविंद चव्हाण हे अ. भा. मराठी नाट्य परिषद, बोरिवली शाखेचे अध्यक्ष होते. त्यांच्या 'सुप्रिया प्रॉडक्शन' ने  निर्मिलेल्या 'यु टर्न', 'कथा', 'हिमालयाची सावली', 'वन रूम किचन' सारख्या कलाकृतींची रंगभूमीवर वेगळी ओळख होती. याशिवाय ते वेगवेगळ्या उपक्रमांमध्ये सक्रिय असत. त्यांनी सुरु केलेली 'बोलीभाषा एकांकिका स्पर्धा' ही त्याच उपक्रमांचा एक भाग आहे. 'सुप्रिया प्रॉडक्शन' ने  अनेक उदयोन्मुख युवा कलाकार प्रकाशात आणले जे मनोरंजन क्षेत्रात आज अनेक नाटक-मालिकांतून चमकत आहेत. गेल्या आठ वर्षांमध्ये महाराष्ट्राच्या वेगवेगळ्या बोलीभाषांमधून जवळपास ४०० हून अधिक संघ या स्पर्धेत सहभागी झाले. पहिल्या वर्षापासूनच या स्पर्धेला संपूर्ण महाराष्ट्रातून मिळणारा वाढता प्रतिसाद बघता याही वर्षी रसिक प्रेक्षक, कलाकार आणि रंगकर्मीं चा उत्तम प्रतिसाद मिळेल हे नक्की !